Free Health Camp: शंकरराव पाटील चॅरिटेबल ट्रस्ट संचलित शंकरराव पाटील प्राथमिक आरोग्य केंद्र, इंदापूर यांच्या संयुक्त विद्यमाने तालुक्यातील ‘कर्मयोगी’ शंकरराव पाटील सहकारी साखर कारखाना कार्यक्षेत्रातील माळवाडी नंबर 1 येथे ऊसतोड मजुरांसाठी विशेष मोफत आरोग्य तपासणी शिबिराचे आयोजन करण्यात आले होते. सोमवार, दिनांक 5 जानेवारी रोजी पार पडलेल्या या शिबिरात मजुरांच्या आरोग्याची काळजी घेण्यात आली.
मजुरांना मिळाले हक्काचे उपचार
या शिबिरामध्ये परिसरातील एकूण 103 ऊसतोड मजुरांची सखोल वैद्यकीय तपासणी करण्यात आली. तपासणीनंतर मजुरांना आवश्यक ते औषधोपचार मोफत पुरवण्यात आले. आरोग्याचे निदान करून तज्ज्ञ डॉक्टरांनी मजुरांना पुढील उपचारांसाठी मोलाचे सल्लेही दिले. “अशा शिबिरांमुळे आमचा दवाखान्याचा मोठा खर्च वाचतो,” अशी भावना यावेळी ऊसतोड मजुरांनी व्यक्त करत ट्रस्टचे आभार मानले.
यशस्वीतेसाठी टीमचे परिश्रम
हे शिबिर यशस्वी करण्यासाठी आरोग्य केंद्राच्या प्रमुख डॉ. सारंगी कुंभार, केंद्र प्रमुख महादेव चव्हाण, हनुमंत गोफणे यांच्यासह नर्स व आरोग्य कर्मचाऱ्यांनी विशेष मेहनत घेतली. तसेच शिरसोडी ‘अ’ विभागाचे प्रमुख ए. के. भोंगळे, शिरसोडी ‘ब’ विभागाचे प्रमुख आर. के. नलवडे, कर्मयोगीचे कर्मचारी अनिल व्यवहारे आणि भारत गडदे यांनी नियोजनात मोलाची भूमिका बजावली.
खाऊ वाटपाने मुलांच्या चेहऱ्यावर आनंद
या आरोग्य शिबिरादरम्यान एक हृदयस्पर्शी प्रसंग पाहायला मिळाला. शंकरराव पाटील चॅरिटेबल ट्रस्टचे खजिनदार तुषार रंजनकर आणि ट्रस्टचे इन्चार्ज दिपक जगताप यांनी ऊसतोड मजुरांच्या मुलांची भेट घेतली. कष्टाच्या कामात मजुरांच्या मुलांचे बालपण जपण्यासाठी आणि त्यांच्या चेहऱ्यावर हसू फुलवण्यासाठी दोन्ही पदाधिकाऱ्यांच्या हस्ते लहान मुलांना खाऊचे वाटप करण्यात आले. अचानक मिळालेल्या या भेटीमुळे आणि खाऊमुळे चिमुकल्यांच्या चेहऱ्यावर मोठा आनंद पाहायला मिळाला.
