Pune Crime: मुळशी तालुक्यातील म्हाळुंगे परिसरात एका पोटतिडकीने काम करणाऱ्या महिलेचा तिच्याच पतीने क्रूर अंत केला आहे. भंगार विकून आलेल्या पैशांच्या हिशोबावरून झालेल्या किरकोळ वादाने इतके रौद्र रूप धारण केले की, पतीने आपल्या पत्नीची दगडाने ठेचून निर्घृण हत्या केली. या घटनेमुळे संपूर्ण पुणे जिल्ह्यात खळबळ उडाली असून, बावधन पोलिसांनी आरोपी पतीला बेड्या ठोकल्या आहेत.
नेमका वाद कशासाठी?
कुसुम वसंत पवार (३२) आणि आरोपी दत्ता काळुराम जगताप (३०) हे दोघे म्हाळुंगे परिसरात भंगार गोळा करणे आणि मासेमारी करून आपला उदरनिर्वाह करत होते. शनिवारी (१७ जानेवारी) जमा केलेल्या भंगाराच्या पैशांच्या वाटणीवरून दोघांमध्ये शाब्दिक चकमक उडाली. हा वाद इतका विकोपाला गेला की दत्ताने रागाच्या भरात विवेक गमावला.
अंगावर शहारे आणणारा घटनाक्रम
प्रत्यक्षदर्शी आणि पोलिसांनी दिलेल्या माहितीनुसार, दत्ताने आधी कुसुम यांना अश्लील शिवीगाळ करण्यास सुरुवात केली. त्यानंतर हातातील काठीने त्यांच्या डोक्यावर, मानेवर आणि पोटावर सपासप वार केले. मारहाणीमुळे कुसुम रक्ताच्या थारोळ्यात जमिनीवर कोसळल्या. मात्र, एवढ्यावरही दत्ताचा राग शांत झाला नाही; त्याने जवळच पडलेला एक मोठा दगड उचलला आणि कुसुम यांच्या डोक्यात घातला. या भीषण हल्ल्यात कुसुम यांचा जागीच मृत्यू झाला.
मध्यस्थी करणाऱ्यावरही धावून गेला आरोपी
हे पती-पत्नीचे भांडण सुरू असताना एका महिलेने मध्यस्थी करण्याचा प्रयत्न केला. मात्र, संतापलेल्या दत्ताने त्या महिलेवरही काठीने हल्ला चढवला. या हल्ल्यात फिर्यादी महिलेच्या हाताची बोटं फ्रॅक्चर झाली आहेत.
तीन मुले झाली पोरकी
मयत कुसुम यांना तीन मुले असून, त्यांच्या हत्येमुळे या चिमुकल्यांचे छत्र हरपले आहे. घटनेची माहिती मिळताच बावधन पोलिसांनी तत्परता दाखवत आरोपी दत्ता जगताप याला अटक केली आहे. भंगाराच्या पैशांच्या हिशोबावरून हा प्रकार घडल्याचे प्राथमिक तपासात निष्पन्न झाले आहे. आरोपीला अटक करण्यात आली असून पुढील कायदेशीर प्रक्रिया सुरू आहे, अशी माहिती पोलिसांनी दिली.
