Sunetra Pawar : उपमुख्यमंत्री अजित पवार यांच्या पार्थिवावर बारामतीत अंत्यसंस्कार पार पडत असतानाच, राज्याच्या राजकारणात एका नव्या आणि संवेदनशील चर्चेला तोंड फुटले आहे. अजितदादांचा राजकीय वारसा आणि त्यांच्या रिक्त झालेल्या पदांची जबाबदारी कोणाकडे जाणार? या प्रश्नावर राष्ट्रवादी काँग्रेसचे ज्येष्ठ नेते आणि मंत्री नरहरी झिरवळ यांनी एक खळबळजनक मागणी केली आहे. अजितदादांच्या रिक्त झालेल्या उपमुख्यमंत्रीपदाची धुरा सुनेत्रा पवार यांच्याकडे सोपवावी, असे झिरवळ यांनी स्पष्टपणे म्हटले आहे.
अंत्यविधीच्या ठिकाणीच भविष्यातील राजकारणाचे संकेत?
आज विद्या प्रतिष्ठानच्या मैदानावर अजितदादांना जड अंतःकरणाने अखेरचा निरोप देण्यात आला. या शोकाकुल वातावरणातही दोन महत्त्वाच्या गोष्टींनी राजकीय वर्तुळाचे लक्ष वेधून घेतले. अंत्यविधीच्या सर्व विधींमध्ये पार्थ पवार आणि जय पवार हे दोन्ही पुत्र अग्रभागी होते, ज्यामुळे येणाऱ्या काळात दादांचा राजकीय वारसा हे दोघेच सक्षमपणे चालवतील, असे स्पष्ट संकेत मिळाले आहेत. मात्र, सत्तेच्या समीकरणात नरहरी झिरवळ यांनी सुनेत्रा वहिनींचे नाव पुढे केले आहे. “अजितदादांच्या निधनानंतर पक्षात आणि सत्तेत मोठी पोकळी निर्माण झाली आहे, ती भरून काढण्यासाठी सुनेत्रा पवार यांना उपमुख्यमंत्रीपद देण्यात यावे,” असे झिरवळ यांनी प्रसारमाध्यमांशी बोलताना सांगितले.
पवार कुटुंबाचा ‘प्रॅक्टिकल’ दृष्टिकोन आणि राजकीय गरज
अजित पवार हे केवळ राज्याचे उपमुख्यमंत्रीच नव्हते, तर ते राज्याचे अर्थमंत्री आणि राष्ट्रवादी काँग्रेसचे प्रमुख आधारस्तंभ होते. त्यांच्या अचानक जाण्याने बारामतीसह संपूर्ण महाराष्ट्राच्या राजकारणात अस्थिरता निर्माण झाली आहे. पवार कुटुंब हे नेहमीच त्यांच्या व्यवहार्य राजकारणासाठी ओळखले जाते. पक्षाची विस्कटलेली घडी पुन्हा बसवण्यासाठी आणि राज्यभरातील कार्यकर्त्यांचे मनोबल उंचावण्यासाठी सत्तेत ‘पवार’ आडनावाचाच प्रभावशाली चेहरा असणे आवश्यक असल्याचे राजकीय विश्लेषकांचे मत आहे.
सुनेत्रा पवार यांच्या नावाची चर्चा का?
सुनेत्रा पवार यांनी यापूर्वी बारामती लोकसभा मतदारसंघातून निवडणूक लढवली असून, त्या जनमानसात परिचित आहेत. अजितदादांच्या अनुपस्थितीत बारामतीमधील संघटनात्मक बांधणी आणि सामाजिक कामात त्यांचा नेहमीच सक्रिय सहभाग राहिला आहे. दादांच्या कामाचा आवाका आणि प्रशासकीय शिस्त जवळून पाहिलेल्या व्यक्ती म्हणून त्यांच्या नावाचा विचार व्हावा, असा एक सूर पक्षात उमटत आहे. झिरवळ यांच्या या मागणीनंतर आता महायुती सरकार आणि राष्ट्रवादी काँग्रेस पक्ष यावर काय भूमिका घेणार, याकडे संपूर्ण राज्याचे लक्ष लागले आहे.
