जालना : जालना जिल्ह्यातील अंबड तालुक्यातील महाकाळ फाट्यावर छत्रपती संभाजीनगर-सोलापूर राष्ट्रीय महामार्गावर सोमवारी (दि. ६) सायंकाळी ७.३० वाजेच्या सुमारास भीषण अपघात घडला. भरधाव कंटेनरने पाठीमागून दोन दुचाकींना धडक दिल्याने एकाच कुटुंबातील पती-पत्नी व त्यांची ४ वर्षांची मुलगी जागीच ठार झाली. दुसऱ्या दुचाकीवरील पती-पत्नी गंभीर जखमी झाली असून, अपघातानंतर कंटेनर चालक पळून गेला. मामाच्या मुलाचे लग्न लावून घराकडे परत येत असलेल्या या निरागस कुटुंब उद्ध्वस्त झाल्याने संपूर्ण जिल्ह्यात हळहळ व्यक्त होत आहे.
विकास अन्नासाहेब जाधव (वय २८, रा. रोहीलागड, ता. अंबड, जि. जालना) हे पत्नी साक्षी (वय २३) व मुलगा अथर्व (वय ४) हे उमापूर (ता. गेवराई, जि. बीड) येथे मामाच्या मुलाचे लग्न लावून दुचाकीने छत्रपती संभाजीनगरकडे परतत होते. शहागड-वडीगोद्री रोडवर महाकाळ फाट्याजवळ कंटेनरने दोन दुचाकींना जोरदार धडक दिली.
कंटेनरने दुचाक्या दूरपर्यंत फरफटत नेल्या, ज्यामुळे अपघातस्थळी रक्तसागर उसळला. ग्रामस्थ व वाहनचालकांनी कंटेनर थांबवण्याचा प्रयत्न केला, पण चालकाने घटनास्थळ सोडले. जखमींची पाहणी केल्यावर विकास, साक्षी व अथर्व हे तिघेही मृत अवस्थेत सापडले. नातेवाईकांच्या माहितीनुसार, साक्षी गरोदर असल्याने ही घटना आणखी हृदयद्रावक ठरली आहे.
दुसरे कुटुंबही अपघाताच्या जाळ्यात
दुसऱ्या दुचाकीवर संतोष बनसोडे (वय २९) व पत्नी मोनिका (वय २५, रा. वळदगाव, जि. छत्रपती संभाजीनगर) हेही अपघातात सापडले. दोघेही गंभीर जखमी असून, त्यांच्यावर छत्रपती संभाजीनगर येथील रुग्णालयात उपचार सुरू आहेत. मयत साक्षी व अथर्व यांचे मृतदेह पाचोड ग्रामीण रुग्णालयात शवविच्छेदनासाठी पाठवण्यात आले, तर विकास जाधव यांचा मृतदेहही छत्रपती संभाजीनगर रुग्णालयात दाखल करण्यात आला होता.
जिल्ह्यात शोककळा
मामाच्या मुलाचे लग्न लावून आनंदात घराकडे निघालेले हे कुटुंब काही क्षणांत उद्ध्वस्त झाले. विकास हे शहानगर चिकलठाणा येथे कार्यरत असून, साक्षी गरोदर असल्याने कुटुंबातील आनंद दुप्पट होता. या घटनेने नातेवाईक व स्थानिक लोकांमध्ये शोककळा पसरली असून, सोशल मीडियावरही हळहळ व्यक्त होत आहे. पोलिसांनी गुन्हा दाखल केला असून, तपास सुरू आहे.
