Beed Crime News: बीड जिल्ह्याच्या सीमेजवळील मांदगाव परिसरात बुधवारी उशिरा शरद पवार गटाचे कार्यकर्ते आणि सामाजिक कार्यकर्ते राम खाडे यांच्यावर झालेल्या जीवघेण्या हल्ल्यामुळे खळबळ उडाली आहे. रात्री प्रवास करत असताना दहा ते पंधरा जणांच्या मुखवटाधारी गटाने त्यांच्या वाहनाला अडवून अचानक हल्ला चढवला. सुरुवातीला गाडीवर दगडफेक करत वाहनाची तोडफोड करण्यात आली आणि त्यानंतर धारदार शस्त्रांनी खाडे यांच्यावर वार करण्यात आले. स्वतःचा बचाव करताना त्यांनी हातावर काही वार झेलले. यात खाडे गंभीर दुखापत झाले आहेत.
घटनेनंतर त्यांना तातडीने अहिल्यानगरातील खासगी रुग्णालयात दाखल करण्यात आले. रुग्णालयात पोहोचेपर्यंत त्यांची शुद्ध हरपली होती आणि हातावर खोल जखमा होत्या. प्राथमिक उपचारांनंतर त्यांच्या प्रकृतीची गंभीरता लक्षात घेता त्यांना पुढील उपचारांसाठी पुण्यात हलविण्यात आले. पोलिसांनी तपास सुरू केला असला तरी हल्लेखोरांची ओळख स्पष्ट झालेली नाही.
नेमके घडले काय?
नगर–सोलापूर महामार्गावरील मांदळी गावाजवळ ही घटना घडली. हॉटेलमध्ये जेवण करून खाडे व त्यांचे सहकारी नगरकडे परतत असताना अज्ञात टोळक्याने चेहऱ्यावर रुमाल बांधून लाठ्या, सत्तूर, तलवारी आणि पिस्तुलासारख्या शस्त्रास्त्रांसह त्यांच्यावर हल्ला चढवला. या अचानक झालेल्या हल्ल्यात खाडे यांच्यासोबत त्यांच्या तिघा सहकाऱ्यांनाही गंभीर मार बसला.
हल्ल्यानंतर घटनास्थळी मिळालेल्या व्हिडिओमध्ये एका हल्लेखोराच्या हातातून सत्तूर खाली पडल्याचे स्पष्ट दिसत असल्याची माहिती आहे. राजकीय वैमनस्यातून हा हल्ला घडवून आणल्याचा आरोप खाडे यांचे जखमी सहकारी दीपक खिळे यांनी केला आहे. खाडे यांनी भ्रष्टाचाराविरोधात दिलेल्या तक्रारींमुळेच त्यांना लक्ष्य केले गेले, असा त्यांचा दावा आहे. त्यामुळे वास्तविक हल्लेखोरांसह या कटामागील सूत्रधारांनाही अटक करावी, अशी मागणी त्यांनी केली आहे.
