नवी दिल्ली: गेल्या सात दिवसांपासून शेअर बाजारात मोठी घसरण झाली आहे. यामुळे गुंतवणूकदारांच्या चेहऱ्यावर चिंतेच्या रेषा वाढू लागल्या आहेत. शेअर बाजारात आतापर्यंत करोडो लोकांचे लाखो रुपयांचे नुकसान झाले आहे. अशा परिस्थितीत सरकारने मोठा दिलासा दिला आहे. सरकारने कर्मचारी भविष्य निर्वाह निधीचे व्याजदर पूर्वीप्रमाणेच कायम ठेवले आहेत. यामध्ये कोणतेही बदल केलेले नाहीत. याचा अर्थ असा की तुम्ही शेअर बाजारातून कमाई करा किंवा न करा, पीएफमध्ये जमा केलेल्या पैशातून तुम्हाला चांगले उत्पन्न मिळत राहील.
ईपीएफओने २०२४-२५ साठी कर्मचारी भविष्य निर्वाह निधी (ईपीएफ) ठेवींवर ८.२५ टक्के व्याजदर कायम ठेवला आहे. शेअर बाजार सतत घसरत असतानाही ईपीएफओने व्याजदर कायम ठेवला आहे. ईपीएफओने बाजारात असलेल्या त्यांच्या निधीचा काही भाग उत्पन्न मिळविण्यासाठी वापरला आहे.
यापूर्वीही वाढले आहेत ईपीएफओचे दर
यापूर्वी, फेब्रुवारी २०२४ मध्ये, कर्मचारी भविष्य निर्वाह निधी संघटनेने (EPFO) २०२३-२४ साठी ईपीएफवरील व्याजदर ८.२५ टक्के केला होता. तर २०२२-२३ मध्ये हा व्याजदर ८.१५ टक्के होता. मार्च २०२२ मध्ये, ईपीएफओने त्यांच्या ७ कोटींहून अधिक सदस्यांसाठी ८.१ टक्के व्याजदर निश्चित केला होता. २०२१-२२ या आर्थिक वर्षासाठी निश्चित केलेला हा व्याजदर त्यावेळी ४० वर्षांतील सर्वात कमी होता. १९७७-७८ नंतरचा हा सर्वात कमी व्याजदर होता. यापूर्वी २०२०-२१ मध्ये हा व्याजदर ८.५ टक्के होता.
सीबीटीचा मोठा निर्णय
ईपीएफओबाबत निर्णय घेणारी सर्वोच्च संस्था म्हणजे सेंट्रल बोर्ड ऑफ ट्रस्टीज (सीबीटी). शुक्रवारी झालेल्या बैठकीत सीबीटीने २०२४-२५ साठी ईपीएफवर ८.२५ टक्के व्याज देण्याचा निर्णय घेतला आहे. सीबीटीच्या निर्णयानंतर, २०२४-२५ साठी ईपीएफ ठेवींवरील व्याजदर मंजुरीसाठी अर्थ मंत्रालयाकडे पाठवला जाईल. अर्थ मंत्रालयाकडून मंजुरी मिळाल्यानंतर, २०२४-२५ साठी ईपीएफवरील व्याजदर ईपीएफओच्या सात कोटींहून अधिक सदस्यांच्या खात्यात जमा केला जाईल. अर्थ मंत्रालयामार्फत सरकारकडून मंजुरी मिळाल्यानंतरच ईपीएफओ व्याज जमा करते.
