नवी दिल्ली : इलेक्ट्रिक वाहनांवर कर वाढल्यास भारतीय वाहन उद्योगातील ई-वाहनांचा वाढीचा प्रवास खंडात होईल, अशी चिंता किया इंडियाचे व्यवस्थापकीय संचालक आणि मुख्य कार्यकजरी अधिकारी गुआंगू ली यांनी नवीन एसयूव्ही ‘सिरॉस’चे अनावरणप्रसंगी बोलताना केली.
सध्या नवीन इलेक्ट्रिक वाहनांवर ५ टक्के दराने वस्तू आणि सेवा कर (जीएसटी) आकारला जातो. तथापि, जुन्या ईव्हीवरील जीएसटी दर १२ टक्क्यांवरून १८ टक्क्यांपर्यंत वाढण्याची शक्यता आहे. इलेक्ट्रिक वाहनांवरील संभाव्य कर वाढीच्या परिणामाबद्दल विचारले असता ली म्हणाले, इलेक्ट्रिक वाहनांच्या उच्च किमती अजूनही एक मोठा भार आहेत. त्यामुळे सरकारकडून कोणत्याही कर सवलतीशिवाय इलेक्ट्रिक वाहन बाजारात उतरवणे फार कठीण आहे, असे ते म्हणाले. किया इंडियाला या वर्षी २.५५ लाख वाहनांच्या तुलनेत सुमारे तीन लाख वाहनांची वार्षिक विक्री अपेक्षित आहे, असेही ते म्हणाले. कॉम्पॅक्ट एसयूव्ही प्रकारातील सोनेट नंतर सिराँस ही नवीन एसयूव्ही कंपनीने बाजारात दाखल केली आहे. कंपनीने त्याची किंमत जाहीर केलेली नाही; परंतु इच्छुक ग्राहक ३ जानेवारीपासून ते बुक करू शकतात. ग्राहकांना सिरॉसचे वितरण फेब्रुवारीपासून सुरू होईल.
एसयूव्हीमध्ये सिराँसकडून विक्रीत वाढ होण्याची अपेक्षा आहे. कॉम्पॅक्ट एसयूव्ही आणि मिड-एसयूव्ही प्रकारातील बाजारपेठेतील हिस्सा पुढील वर्षी १५ टक्क्यांवरून २० टक्क्यांपर्यंत वाढवण्याचे कंपनीचे लक्ष्य आहे. आरामदायी आणि सुरक्षित प्रवास आणि भविष्यातील तंत्रज्ञान या संकल्पनेवर हे नवीन मॉडेल विकसित करण्यात आल्याचे किया इंडियाचे वरिष्ठ उपाध्यक्ष (विक्री आणि विपणन) हरदीप सिंग ब्रार यांनी सांगितले. सुरक्षित प्रवासासाठी सिरॉसमध्ये एडीएएस २.० तंत्रज्ञान आणि एअरबॅगसह इतर महत्त्वाच्या वैशिष्ट्यांचा समावेश आहे.
