Madhuri Political Entry Rumors: बॉलिवूडची ‘धकधक गर्ल’ म्हणून अवघ्या जगभरात चाहत्यांच्या हृदयावर अधिराज्य गाजवणारी माधुरी दीक्षित पुन्हा एकदा चर्चेत आली आहे. यावेळी मात्र कारण तिचा अभिनय नव्हे, तर तिचा कथित राजकीय प्रवेश. ‘मिसेस देशपांडे’ या वेब सीरिजद्वारे ओटीटी जगतात पदार्पणासाठी सज्ज असलेली माधुरी, प्रोफेशनल लाइफसोबत आता वैयक्तिक आयुष्यामुळेही चर्चेच्या केंद्रस्थानी आहे.
गेल्या काही आठवड्यांपासून सोशल मीडियावर आणि राजकीय वर्तुळात माधुरी दीक्षित निवडणुकीच्या मैदानात उतरणार, अशी जोरदार चर्चा रंगली होती. 2024 च्या लोकसभा आणि विधानसभा निवडणुका तोंडावर असताना याच अफवांना उधाण आले होते. त्या वेळीही या बातम्या फक्त चर्चांपुरत्याच मर्यादित राहिल्या. आता स्थानिक स्वराज्य संस्थांच्या निवडणूक घोषणा झाल्या तशी पुन्हा माधुरीच्या राजकीय प्रवेशाची चर्चा रंगू लागली. मात्र, आता स्वतः माधुरीनेच या सर्व अफवांवर पडदा टाकला आहे.
हेही वाचा – समांथा प्रभू पुन्हा बोहल्यावर! ‘या’ प्रसिद्ध दिग्दर्शकाशी बांधली लग्नगाठ
एएनआयला दिलेल्या मुलाखतीत माधुरी दीक्षितने राजकारणात प्रवेश करण्याच्या चर्चांवर पहिल्यांदाच प्रतिक्रिया दिली. कोणताही राजकीय मार्ग स्वीकारण्याचा तिचा विचार नसल्याचे तिने ठामपणे सांगितले. माधुरी म्हणाली, ‘मला स्वतःलाही याबद्दल खात्री नाही… पण माझ्या मते राजकारण माझा मार्ग नाही. एक कलाकार म्हणून समाजात जागरूकता निर्माण करणं, माझे विचार मांडणं, आणि शक्य तितक्या लोकांना मदत करणं हेच माझं ध्येय आहे.’
पुढे ती म्हणाली, राजकारणात जाणं कधीच माझं लक्ष्य नव्हतं. मी स्वतःला त्या जागी ठेऊ शकत नाही. एक अभिनेत्री म्हणून मी जे करू शकते ते मला राजकारणापेक्षा खूप अधिक अर्थपूर्ण वाटतं. माधुरीच्या या वक्तव्यामुळे तिच्या नावावरून सुरू झालेल्या राजकीय चर्चांना आता पूर्णविराम मिळाला आहे. तिच्या चाहत्यांसाठी मात्र ही मोठी दिलासा देणारी बातमी ठरली आहे.
