PMO Office Name Change: केंद्र सरकारने देशातील महत्त्वाच्या सरकारी संस्थांच्या नावांमध्ये मोठा बदल करत पंतप्रधान कार्यालयाचे (PMO) नाव आता ‘सेवा तीर्थ’ असे ठेवले आहे. तसेच देशभरातील सर्व राजभवनांची नावे बदलून त्यांना ‘लोक भवन’ असे संबोधले जाणार आहे. सरकारच्या म्हणण्यानुसार हा बदल केवळ प्रशासकीय नसून सांस्कृतिक दृष्ट्याही अत्यंत महत्त्वाचा आहे.
पंतप्रधान कार्यालयाच्या निवेदनानुसार, भारतातील सार्वजनिक संस्थांमध्ये सत्तेकडून सेवेकडे आणि अधिकाराकडून जबाबदारीकडे असा परिवर्तनाचा प्रवाह सुरू आहे. साउथ ब्लॉकमध्ये गेली 78 वर्षे असलेले पंतप्रधान कार्यालय आता ‘सेवा तीर्थ’ नावाच्या नवीन अत्याधुनिक कॅम्पसमध्ये स्थलांतरित होत आहे. हा बदल सेंट्रल व्हिस्टा पुनर्विकास प्रकल्पाचा एक प्रमुख भाग मानला जातो.
सरकारने यापूर्वीही महत्त्वाच्या स्थळांची नावे बदलली आहेत. राजपथचे नाव ‘कर्तव्य पथ’ असे बदलण्यात आले, ज्यामागील संदेश सत्ता ही विशेषाधिकार नसून एक कर्तव्य आहे. 2016 मध्ये पंतप्रधानांच्या निवासस्थानाचे नाव ‘रेसकोर्स रोड’ वरून ‘लोक कल्याण मार्ग’ असे करण्यात आले. हे नाव जनकल्याणाची भावना अधोरेखित करते.
अधिकाऱ्यांच्या मते, पंतप्रधान नरेंद्र मोदी यांच्या कार्यकाळात प्रशासनाला कर्तव्य, पारदर्शकता आणि उत्तरदायित्व यांवर आधारित करण्यासाठी अनेक रचनात्मक बदल करण्यात आले आहेत. त्याचाच एक भाग म्हणून उभारलेले नवीन केंद्रीय सचिवालय आता ‘कर्तव्य भवन’ म्हणून ओळखले जाईल.
