Amol Mitkari: राज्याचे माजी उपमुख्यमंत्री अजित पवार यांच्या अकाली निधनाला १५ दिवस उलटले असले, तरी राजकीय वर्तुळातून आणि कार्यकर्त्यांच्या मनातून त्यांचे अस्तित्व पुसले गेलेले नाही. विमान अपघाताच्या त्या भीषण बातमीवर आजही कोणाचा विश्वास बसत नाहीये. याच पार्श्वभूमीवर, ‘व्हॅलेंटाईन डे’चे औचित्य साधून राष्ट्रवादीचे आमदार अमोल मिटकरी यांनी अजित दादांच्या आठवणीत एक अत्यंत भावूक जाहीर पत्र लिहिले आहे.
“भविष्यानं ताटात काय वाढलंय ठाऊक नाही…”
अमोल मिटकरी यांनी आपल्या पत्रातून अजित दादांना ‘लव्ह यू’ म्हणत आपल्या भावनांना वाट मोकळी करून दिली आहे. “दादा असताना त्यांच्यासमोर प्रेम व्यक्त करण्याची हिंमत झाली नाही, पण आज ते नसताना हे शब्द ओठावर येत आहेत,” असे मिटकरींनी म्हटले आहे. पत्रातील सर्वात अस्वस्थ करणारा भाग म्हणजे मिटकरींनी व्यक्त केलेली भविष्याची चिंता. “भविष्यानं माझ्या ताटात काय वाढून ठेवलंय, हे आता सांगता येणार नाही,” अशा शब्दांत त्यांनी आपला आधार हरवल्याचं म्हटलं आहे.
मिटकरींच्या यांच्या पत्रातील मुद्दे
मिटकरी यांनी म्हटलं आहे की, ‘एक सामान्य घरातील मुलगा असूनही तुम्ही मला २०१९ ला पक्षात घेतलं, आमदार केलं, घर उभं करून दिलं आणि समाजात प्रतिष्ठा मिळवून दिली. वडिलांच्या निधनानंतर मला सावरणारे आणि माझ्या कामावर विश्वास ठेवणारे तुम्हीच होता. अनेकांसाठी मी ‘अप्रिय’ असलो तरी तुम्हाला ‘प्रिय’ होतो, हीच माझी मोठी कमाई. तुमच्या नावाच्या बळावर मी आजवर प्रशासनात वावरलो. शिस्त आणि कामात झोकून देण्याचा मंत्र तुम्हीच दिलात. आज एकादशी आहे, तुमच्यामुळेच मी विठ्ठलाच्या प्रेमात पडलो, पण त्यानेच तुम्हाला हिरावून नेलं. आता त्या विठ्ठलाशी माझं आयुष्यभर भांडण राहील.’
अपघाताच्या चौकशीची मागणी
अजित पवार यांच्या निधनामुळे संपूर्ण महाराष्ट्र शोकाकुल असतानाच, आमदार रोहित पवार यांनी या विमान अपघाताच्या सखोल चौकशीची मागणी केली आहे. ‘दादा आजही आपल्यातच आहेत आणि ते एखाद्या पत्रकार परिषदेत पुन्हा दिसतील,’ अशी आशा आजही अनेक कार्यकर्त्यांच्या मनात कायम आहे.
