Dahisar Crime News: महानगरपालिका निवडणुकीच्या रणधुमाळीत दहिसरमध्ये एक धक्कादायक प्रकार समोर आला आहे. शिवसेना (शिंदे गट) उमेदवार रेखा राम यादव यांच्या प्रचारादरम्यान, घरात प्रवेश करण्यास मज्जाव केल्याच्या रागातून कार्यकर्त्यांनी दोन व्यक्तींना लाथा-बुक्क्यांनी आणि पक्षाच्या झेंड्यांनी अमानुष मारहाण केली. या घटनेचा व्हिडिओ सोशल मीडियावर व्हायरल झाल्यानंतर परिसरात संतापाची लाट उसळली आहे.
नेमकं काय आहे प्रकरण ?
दहिसर पश्चिम येथील प्रभाग क्रमांक १ मधील विठ्ठलवाडी सोसायटी परिसरात सोमवारी संध्याकाळी ही घटना घडली. शिंदे गटाची प्रचार फेरी सुरू असताना ८ ते १० कार्यकर्ते एका घरात मतदारांशी संवाद साधण्यासाठी शिरत होते. मात्र, संबंधित घरमालकाने घरात येण्यास आणि प्रचार करण्यास विरोध दर्शवला. या किरकोळ कारणावरून कार्यकर्ते संतापले आणि त्यांनी घरात शिरून दोन व्यक्तींवर हल्ला चढवला.
झेंड्यांच्या काठ्यांनीही प्रहार
प्रचारासाठी हातात घेतलेल्या पक्षाच्या झेंड्यांचा वापर कार्यकर्त्यांनी मारहाणीसाठी केला. व्हायरल झालेल्या व्हिडिओमध्ये कार्यकर्ते आक्रमक होऊन नागरिकांना मारहाण करताना स्पष्ट दिसत आहेत. या गुंडगिरीमुळे दहिसर परिसरात राजकीय तणाव निर्माण झाला असून सामान्य मतदारांमध्ये भीतीचे वातावरण आहे.
पोलीस कारवाई आणि गुन्हा दाखल
या घटनेनंतर पीडितांनी तत्काळ पोलीस स्टेशन गाठले. एम.एच.बी. पोलिसांनी परिस्थितीचे गांभीर्य ओळखून मध्यरात्रीच ८ ते १० अज्ञात कार्यकर्त्यांविरोधात विविध कलमान्वये गुन्हा दाखल केला आहे. पोलिसांकडून सध्या या आरोपींची धरपकड सुरू आहे.
नागरिकांचा संतप्त सवाल
निवडणूक जिंकण्याआधीच जर कार्यकर्त्यांची ही दादागिरी असेल, तर लोकप्रतिनिधी म्हणून निवडून आल्यावर हे काय करतील? असा संतप्त सवाल दहिसरमधील स्थानिक नागरिक विचारत आहेत. ऐन मतदानाच्या तोंडावर घडलेल्या या हिंसक घटनेमुळे उमेदवाराच्या अडचणीत वाढ होण्याची शक्यता आहे.
