Pune Metro: लग्नापूर्वीच्या आठवणी टिपण्यासाठी मेट्रो परिसर निवडणं एका जोडप्याला चांगलंच महागात पडलं आहे. पुण्यातील या जोडप्याने अधिकृत परवानगी न घेता पुणे मेट्रोच्या परिसरात आणि ट्रेनमध्ये प्री-वेडिंग फोटोशूट केल्यामुळे मेट्रो प्रशासनाने त्यांच्यावर दंडात्मक कारवाई केली आहे. मेट्रो अधिकाऱ्यांच्या माहितीनुसार, मेट्रो कर्मचाऱ्यांनी वारंवार इशारे देऊनही जोडप्याने आणि छायाचित्रकाराने शूटिंग सुरूच ठेवले. त्यामुळे मेट्रोच्या नियमांचे उल्लंघन झाल्याने संबंधित सर्वांवर कारवाई करण्यात आली.
पुणे मेट्रो प्रशासनाने स्पष्ट केले की, कोणत्याही प्रकारचे फोटोशूट, व्हिडिओ शूट किंवा प्रमोशनल गोष्टींना पूर्वपरवानगी आवश्यक आहे. अशा अनधिकृत कृतींमुळे मेट्रोच्या नियमित कामकाजात व्यत्यय येऊ शकतो आणि प्रवाशांच्या सुरक्षेलाही धोका निर्माण होऊ शकतो.
प्रशासनाने नागरिकांना आवाहन केले आहे की, मेट्रो परिसरात शिस्त आणि सुरक्षिततेचा भंग करणाऱ्या कृती टाळाव्यात. मेट्रो क्षेत्र हे सार्वजनिक ठिकाण असल्याने त्यात नियमांचे पालन करणे प्रत्येक प्रवाशाचे कर्तव्य असल्याचे अधिकाऱ्यांनी सांगितले.
