Salil Deshmukh Resigns: स्थानिक स्वराज्य संस्थांच्या निवडणुकांच्या पार्श्वभूमीवर राज्याच्या राजकारणात आणखी एक मोठा भूकंप झाला आहे. शिंदे गट आणि भाजपात सुरू असलेल्या मोठ्या प्रमाणातील पक्षप्रवेशामुळे आधीच वातावरण तापले असताना, आता शरद पवार गटालाही मोठा धक्का बसला आहे. माजी गृहमंत्री अनिल देशमुख यांचे पुत्र सलिल देशमुख यांनी पवार गटातील सक्रिय सदस्यत्वाचा राजीनामा दिला आहे. सलिल देशमुख यांनी आपला राजीनामा शरद पवार, सुप्रिया सुळे आणि रोहित पवार यांना थेट पाठवला असून, त्यांच्या या निर्णयाने राजकीय चर्चांना जोर आला आहे. स्थानिक स्वराज्य निवडणुका सुरू असताना त्यांचा राजीनामा अनेक प्रश्न निर्माण करणारा ठरत आहे.
प्रकृती बिघडल्याचा दाखला
राजीनामा देताना सलिल देशमुख यांनी आरोग्य बिघडल्याचे मुख्य कारण पुढे केले आहे. डॉक्टरांच्या सल्ल्यानुसार काही महिन्यांसाठी विश्रांतीची गरज असल्यामुळे ते सक्रिय राजकारणापासून दूर जात असल्याचे त्यांनी सांगितले. उद्याची परिस्थिती काय असेल ते सांगता येत नाही, मात्र सध्या मी प्रकृतीमुळे बाजूला होत आहे, असेही त्यांनी पत्रकारांशी बोलताना नमूद केले. ते दुसऱ्या पक्षात जाणार का? असा प्रश्न विचारला असता त्यांनी कोणताही ठाम खुलासा टाळला.
20 वर्षांची सक्रिय राजकीय कारकीर्द
सलिल देशमुख यांनी पत्रात नमूद केले आहे की, ते मागील 20-22 वर्षांपासून राष्ट्रवादी काँग्रेस (शरद पवार गट) मध्ये सक्रिय होते. नागपुर तसेच विदर्भ प्रदेशात युवक संघटनांमध्ये काम करताना त्यांनी अनेक उपक्रम राबवले. जिल्हा परिषद सदस्य म्हणून काम करताना अनेक विकासकामे आणि प्रकल्प राबवण्यात त्यांनी योगदान दिल्याचे त्यांनी आपल्या राजीनामा पत्रात खास म्हटले आहे. मात्र, आरोग्याच्या अडचणींमुळे पुढील सहा महिने कोणतेही राजकीय काम करणे शक्य नसल्याने त्यांनी स्वेच्छेने पदाचा राजीनामा देत असल्याचे नमूद केले आहे. प्रकृती सुधरल्यानंतर पुन्हा जनतेच्या सेवेत सक्रिय होण्याचा निर्धारही त्यांनी व्यक्त केला आहे.
राजकीय वर्तुळात चर्चांना उधाण
एकीकडे शिंदे गट आणि भाजपात प्रवेशांची लगबग सुरू असताना, दुसरीकडे पवार गटातील हा राजीनामा अनेक तर्क-वितर्कांना वाव देत आहे. नेमका हा निर्णय फक्त आरोग्यापुरता मर्यादित आहे की यामागे काही वेगळे कारण दडलंय? यावर राजकीय वर्तुळात चांगलीच चर्चा रंगली आहे.
