Manikrao Kokate News: सभागृहात मोबाईलवर रम्मी खेळतानाचा व्हिडिओ व्हायरल झाल्यानंतर कृषी खाते गमावलेले राज्याचे क्रीडामंत्री माणिकराव कोकाटे पुन्हा एकदा गंभीर अडचणीत सापडले आहेत. तब्बल तीन दशकांपूर्वीच्या शासकीय सदनिका गैरव्यवहार प्रकरणात त्यांना सुनावलेली दोन वर्षांची शिक्षा नाशिक जिल्हा सत्र न्यायालयानेही कायम ठेवल्याने त्यांच्या राजकीय भवितव्यावर मोठे संकट घोंघावत आहे. स्थानिक स्वराज्य संस्थांच्या निवडणुका तोंडावर असताना या निर्णयामुळे आमदारकीसह मंत्रिपद धोक्यात येण्याची शक्यता वर्तवली जात आहे.
मुख्यमंत्री कोट्यातून मिळालेल्या सदनिकांसाठी बनावट कागदपत्रांचा वापर केल्याच्या आरोपाखाली मंत्री माणिकराव कोकाटे आणि त्यांचे भाऊ सुनील कोकाटे यांना यापूर्वी प्रथम वर्ग न्यायालयाने दोषी ठरवले होते. त्या वेळी न्यायालयाने दोघांनाही प्रत्येकी दोन वर्षांचा कारावास आणि 50 हजार रुपयांचा दंड ठोठावला होता. निकालानंतर काही तासांतच जामीन मंजूर झाल्याने तत्कालीन काळात त्यांचे मंत्रीपद अबाधित राहिले होते. मात्र, आता जिल्हा सत्र न्यायालयानेही तोच निकाल कायम ठेवल्याने प्रकरण निर्णायक वळणावर आले आहे.
विरोधकांकडून राजीनाम्याची मागणी?
या शिक्षेच्या पुष्टीमुळे विरोधी पक्षांकडून नैतिकतेच्या मुद्द्यावरून कोकाटे यांच्या राजीनाम्याची मागणी तीव्र होण्याची शक्यता आहे. न्यायालयाच्या या निर्णयाने राज्याच्या राजकारणात मोठी खळबळ उडाली असून, सरकार यावर नेमकी कोणती भूमिका घेणार याकडे सर्वांचे लक्ष लागले आहे.
काय आहे नेमंक प्रकरण?
दरम्यान, १९९५ ते १९९७ या कालावधीत राज्य सरकारच्या १० टक्के आरक्षित कोट्यातून सदनिका मिळवण्यासाठी उत्पन्नाबाबत चुकीची माहिती दिल्याचा आरोप माणिकराव कोकाटे यांच्यावर करण्यात आला होता. या प्रकरणात त्यांच्या विरोधात सरकारवाडा पोलीस ठाण्यात गुन्हा दाखल करण्यात आला होता. तत्कालीन अप्पर जिल्हाधिकाऱ्यांनी चौकशी करून बनावट कागदपत्रे आणि फसवणुकीचे पुरावे सादर केल्यानंतर कारवाई सुरू झाली. माजी मंत्री तुकाराम दिघोळे यांनी या संदर्भात तक्रार दाखल केली होती. त्यानंतर कोकाटे यांच्याविरोधात भारतीय दंड विधानाच्या ४२०, ४६५, ४७१ आणि ४७ अन्वये गुन्हे दाखल झाले. जवळपास ३० वर्षे हे प्रकरण न्यायप्रविष्ट राहिले. अखेर प्रथम वर्ग न्यायालयाने शिक्षा सुनावल्यानंतर आता जिल्हा सत्र न्यायालयानेही तोच निर्णय कायम ठेवला आहे.
तथापी, अजित पवार यांच्या नेतृत्वाखालील राष्ट्रवादी काँग्रेस पक्षाचे सिन्नर विधानसभा मतदारसंघाचे आमदार असलेले माणिकराव कोकाटे हे विधानसभेत रम्मी खेळतानाच्या प्रकरणामुळे आधीच वादात सापडले होते. त्यानंतर त्यांच्याकडील कृषिमंत्रीपद काढून घेण्यात आले आणि युवक कल्याण व क्रीडाखात्याची जबाबदारी देण्यात आली. मात्र, आता सदनिका गैरव्यवहार प्रकरणातील न्यायालयीन निर्णयामुळे त्यांची राजकीय वाटचाल पुन्हा एकदा कठीण वळणावर आली आहे.
