Lonavala Municipal Council: लोणावळा नगरपरिषद निवडणुकीत मोठा राजकीय बदल घडला असून मावळचे आमदार सुनील शेळके यांच्या मध्यस्थीने दोन्ही राष्ट्रवादी काँग्रेस गट एकत्र आले आहेत. राष्ट्रवादी काँग्रेस शरदचंद्र पवार गटाने अजित पवारांच्या राष्ट्रवादी गटाला बिनशर्त पाठिंबा देण्याची अधिकृत घोषणा केली आहे. या निर्णयामुळे स्थानिक राजकारणात नवे समीकरण निर्माण झाले असून भाजपविरुद्ध संयुक्त लढत उभारली जाणार आहे.
अधिकृत माहितीनुसार, फक्त प्रभाग क्रमांक १३ मध्ये दोन्ही गटांमध्ये मैत्रीपूर्ण लढत होणार आहे. तिथे उमेदवार एकमेकांविरोधात उभे राहतील, परंतु उर्वरित सर्व प्रभागांमध्ये शरद पवार गटाचे कार्यकर्ते अजित पवार गटाच्या उमेदवारांसाठी प्रचार करणार आहेत. दोन्ही गटांची मतशक्ती एकत्र आल्याने भाजपला मोठा फटका बसू शकतो, असा राजकीय अंदाज व्यक्त केला जात आहे.
हेही वाचा – रायगडमध्ये राजकीय भूंकप! सुनील तटकरे भाजपात जाणार? शिंदे गटाच्या ‘या’ नेत्याचा दावा
दरम्यान, पत्रकार परिषदेत बोलताना आमदार सुनील शेळके म्हणाले की, शरद पवार गटाने दाखवलेल्या सकारात्मक भूमिकेचा आम्ही आदर करतो. त्यांच्या पदाधिकाऱ्यांना योग्य स्थान मिळेल. लोणावळा नगरपालिका, वडगाव नगरपंचायत आणि इतर शासकीय समित्यांमध्येही दोन्ही गटांच्या सहकार्याने सकारात्मक निर्णय घेतले जातील. शेळके यांनी विश्वास व्यक्त केला की शरद पवार यांना मानणारा मतदार वर्ग आगामी महापालिका निवडणुकांमध्येही त्यांच्यासोबत राहील. लोणावळ्यात तयार झालेलं हे नव्या मैत्रीचं समीकरण आगामी निवडणुकीत ‘गेम चेंजर’ ठरू शकतं. काँग्रेसच्या दोन्ही गटांनी हातमिळवणी केल्यामुळे भाजपसमोर कठीण आव्हान उभं राहणार असून, आता अंतिम निकालाची उत्सुकता वाढली आहे.
