पुणे: हडपसर विधानसभा मतदारसंघातील नऊ मशिनची २५ जुलै रोजी फेरमोजणी केली जाणार आहे, अशी माहिती जिल्हाधिकारी कार्यालयातून देण्यात आली आहे. त्यानुसार या मतदारसंघातील उमेदवारांना या फेरमोजणीसाठी एका प्रतिनिधीची नेमणूक करता येणार असून, त्याबाबतची माहिती जिल्हाधिकारी कार्यालयाच्या मतदान विभागात द्यावी, असे कळविण्यात आले आहे. २५ जुलै ते ८ ऑगस्ट या कालावधीत या नऊ मतदान मशिनशी संबंधित व्हीव्हीपॅट मधील मतदानाची मोजणी केली जाणार आहे.
नोव्हेंबर २०२४ मध्ये झालेल्या विधानसभा निवडणुकीनंतर महाविकास आघाडीचे उमेदवार प्रशांत जगताप यांनी फेरमोजणीसाठी तब्बल १२ लाख रुपये जिल्हाधिकारी कार्यालयाकडे जमा केले होते. या मतदारसंघातील नऊ इलेक्ट्रॉनिक्स मशिनबाबत प्रशांत जगताप यांनी आक्षेप नोंदविला होता. जिल्हा निवडणूक आयोगाकडून नऊ मशिनच्या व्हीव्हीपॅटमधील मतदानाची मोजणी करण्याची परवानगी देण्यात आली होती. त्यानुसार ही फेरमोजणी होणार असल्याचे जगताप यांनी कळविले आहे. या फेरमोजणीबाबत जिल्हाधिकारी कार्यालयातून पत्र मिळाल्याचेही त्यांनी नमूद केले आहे. हडपसर विधानसभा मतदारसंघात जगताप यांचा सात हजार मतांनी पराभव झाला होता. या ठिकाणी राज्याचे उपमुख्यमंत्री अजित पवार यांचे समर्थक आमदार चेतन तुपे यांनी विजय संपादन केला आहे.
