Maharashtra Politics : बुलडाणा जिल्ह्यातील मेहकर येथे राजकीय वातावरण चांगलेच तापले असून शिवसेनेच्या दोन गटांमध्ये संघर्ष उफाळून आला आहे. शिंदे गटाच्या एका पदाधिकाऱ्याने ठाकरेंच्या गटातील आमदाराला थेट धमकी दिल्याचा प्रकार समोर आला आहे.
मिळालेल्या माहितीनुसार, पत्रकार परिषदेत बोलताना शिंदे गटाच्या पदाधिकाऱ्याने सिद्धार्थ खरात यांना उद्देशून “कोणीही असू द्या, आमदारालाही ओढून मारू,” असे वादग्रस्त विधान केले. या वक्तव्यामुळे राजकीय वर्तुळात मोठी खळबळ उडाली आहे.
या पत्रकार परिषदेत संदीप तठ्ठे यांनी माजी आमदार संजय रायमुलकर यांच्या कामाचे श्रेय इतरांनी घेऊ नये, असा इशाराही दिला. “आमच्यावर आधीच अनेक गुन्हे दाखल आहेत, त्यामुळे आम्ही कोणालाही घाबरत नाही,” असेही त्यांनी ठामपणे सांगितले.
या भडक आणि आक्रमक वक्तव्यामुळे मेहकरसह संपूर्ण जिल्ह्यात राजकीय वातावरण अधिकच तापले आहे. विविध पक्षांकडून या विधानाचा निषेध होण्याची शक्यता असून प्रशासन या प्रकरणात काय भूमिका घेणार, याकडे सर्वांचे लक्ष लागले आहे.
दरम्यान, या घटनेचे पडसाद पुढील काही दिवसांत अधिक तीव्र होण्याची शक्यता व्यक्त केली जात असून बुलडाण्यातील राजकारणात तणावाचे वातावरण निर्माण झाले आहे.
