Pune Crime: पुण्यातील गुरुवार पेठेतील एका 40 वर्ष जुन्या सराफी पेढीवर काही दिवसांपूर्वी झालेल्या धाडसी चोरीचा पोलिसांनी छडा लावला आहे. तब्बल 70 किलो चांदीचे दागिने चोरणाऱ्या आरोपींपैकी एका आरोपीला पोलिसांनी उत्तर प्रदेशातून अटक करणाऱ्या आली आहे. आरोपीकडून 36 किलो 442 ग्रॅम चांदी जप्त करण्यात आली आहे.
हेही वाचा – Pune Crime : आधी बायकोचा खून, नंतर नवऱ्यानं स्वत:ला संपवलं, दसऱ्याच्या पूर्वसंध्येला पुणे हादरलं
अटक केलेल्या 36 वर्षीय आरोपीचे नाव राजेश सरोज असून, तो उत्तर प्रदेशच्या प्रतापगढ जिल्ह्यातील कुंडाखचा रहिवासी आहे. या प्रकरणातील दुसरा आरोपी अद्याप फरार असून, पोलिस त्याचा शोध घेत आहेत. सप्टेंबरच्या 14 आणि 15 तारखेला मध्यरात्री चोरट्यांनी गुरुवार पेठेतील सराफी पेढीवर डल्ला मारला होता. या चोरीत तब्बल 67.6 लाख रुपये किमतीची चांदी आणि 5 लाख रुपये रोकड लंपास करण्यात आली होती. चोरट्यांनी तीन पोती भरून चांदी चोरली, ज्याचा व्हिडिओ सोशल मीडियावर व्हायरल झाला होता.
पोलीसांनी घटनास्थळ आणि आसपासच्या सीसीटीव्ही फुटेजची तांत्रिक तपासणी करून आरोपींचा मागोवा घेतला. तपासात समोर आले की, आरोपींनी पोलिसांना दिशाभूल करण्यासाठी कपडे बदलून पुणे रेल्वे स्टेशनवरून उत्तर प्रदेशला पळ काढला होता. या माहितीच्या आधारे खडक पोलीसांनी उत्तर प्रदेशातून राजेश सरोजला अटक केली आणि त्याच्याकडून चोरीची मोठी प्रमाणात चांदी जप्त केली. सध्या पोलिस फरार आरोपीचा शोध घेत आहेत आणि बाकीचा ऐवज ताब्यात आणण्यासाठी कारवाई सुरू आहे.
