पुणे: पूजा खेडकर यांच्या आईचा नवा कारनामा समोर आला आहे. नवी मुंबईत ऐरोली सिग्नलजवळ घडलेल्या एका अपघातानंतर धक्कादायक प्रकार समोर आला आहे. ट्रकचा एका कारला धक्का बसला आणि त्यानंतर कारमधून उतरलेल्या दोन लोकांनी ट्रकचालकाला जबरदस्तीने कारमध्ये बसवून नेले. काही वेळानंतर चालक बेपत्ता झाल्याची तक्रार पोलिसांकडे दाखल करण्यात आली.
तपास सुरू केल्यानंतर पोलिसांना धक्कादायक माहिती मिळाली. ट्रकचालक प्रल्हाद कुमार याला थेट पुण्यातील चतुश्रृंगी परिसरात, पूजा खेडकर यांच्या आई मनोरमा खेडकरच्या घरात डांबून ठेवण्यात आले होते. पोलिसांनी तत्काळ कारवाई करत चालकाची सुरक्षित सुटका केली.
दरम्यान, चौकशीसाठी पोहोचलेल्या पोलिसांशी मनोरमा खेडकर यांनी उघडपणे हुज्जत घातली. त्यांनी घराचा दरवाजा उघडण्यास नकार दिला आणि अधिकाऱ्यांना कारवाईपासून रोखण्याचा प्रयत्न केला. त्यामुळे अखेर पोलिसांना त्यांना समन्स बजावावे लागले.
Sacked IAS probationer Puja Khedkar’s mother, Manorama, confronts police during rescue of kidnapped truck driver from her home. Constable: ‘You’re not opening doors, not cooperating.’ Mentions ‘IPS’—context unclear. #PujaKhedkar #ManoramaKhedkar #IAS #KidnappingCase pic.twitter.com/rHAssQfqZD
— Vijay Kumbhar (@VijayKumbhar62) September 14, 2025
अपघातानंतर घटनास्थळी वाद तसेच धक्काबुक्की झाली होती. ऐरोली सिग्नलवर मिक्सर ट्रकने (MH12 RT5000) कारला धडक दिली होती. ही कार मनोरमा खेडकर यांची असल्याचे समोर आले आहे. अपघातानंतर कारमधून उतरलेल्या व्यक्तींनी चालकाला जबरदस्ती पळवून नेले आणि थेट पुण्यातील घरात कैद केले. सध्या, या प्रकरणात पोलिसांनी पुढील तपास सुरू केला असून मनोरमा खेडकर यांच्यावर काय कारवाई होते याकडे सर्वांचे लक्ष लागले आहे.
