नाशिक: मनमाड नगरपरिषद निवडणुकीच्या तोंडावर शहराला हादरवून टाकणारी घटना घडली असून प्रभाग क्रमांक १० ‘अ’ मधील शिवसेना (ठाकरे गट) उमेदवार नितीन वाघमारे यांचे सोमवारी उशिरा रात्री अचानक निधन झाले. जोरदार प्रचार मोहिमेनंतर घरी परतून विश्रांती घेत असताना आलेल्या हृदयविकाराच्या झटक्यामुळे त्यांचे निधन झाले असावे, अशी प्राथमिक माहिती समोर येत आहे. फक्त २४ वर्षांच्या उमेदवाराचा अचानक मृत्यू झाल्याने सर्वत्र खळबळ उडाली आहे.
नितीन वाघमारे हे तरुण, उत्साही आणि संपर्कात राहणारे उमेदवार म्हणून ओळखले जात होते. उमेदवारी अर्ज दाखल केल्यानंतर त्यांनी प्रभागात सक्रिय प्रचाराला सुरूवात केली होती. नागरिकांशी संवाद, पदयात्रा आणि बैठकांच्या माध्यमातून त्यांनी प्रचार वेगाने वाढवला होता. मात्र अतोनात कामाचा ताण आणि धावपळीच्या काळातच हा अनर्थ ओढवल्याची चर्चा स्थानिकांमध्ये सुरू आहे. निधनाची माहिती मिळताच विविध पक्षांचे नेते, कार्यकर्ते आणि स्थानिक नागरिक धाव घेऊन वाघमारे यांच्या घरी पोहोचले. त्यांनी त्यांच्या पार्थिवाचे दर्शन घेऊन श्रद्धांजली अर्पण केली. तरुण वयात त्यांचा झालेला मृत्यू ही मनमाड शहरासाठी मोठी हानी असल्याचे मत व्यक्त केले जात आहे.
हेही वाचा –नाशिकमध्ये ठाकरे गटाला मोठं खिंडार! अद्वय हिरेंसह राजू शिंदेंचा भाजपमध्ये प्रवेश
निवडणूक जाहीर असताना अधिकृत उमेदवाराच्या निधनामुळे आता प्रभाग क्रमांक १० ‘अ’ मधील निवडणुकीचा कार्यक्रम बदलण्याची शक्यता निर्माण झाली आहे. संबंधित वॉर्डमध्ये मतदानाची तारीख पुढे ढकलली जाणार का, नव्याने अधिसूचना निघणार का, याकडे सर्वांचे लक्ष लागले आहे. मनमाड शहरातील राजकीय वातावरण तापलेले असताना या दुर्दैवी घटनेने निवडणूक प्रक्रियेवर अनिश्चिततेचे सावट पसरले आहे.
