मुंबई : राज्याच्या राजकारणात नव्या घडामोडींना उधाण आले आहे. मुख्यमंत्री देवेंद्र फडणवीस यांनी वरळी येथील एनएससीआय डोममध्ये आयोजित भाजपच्या विजय संकल्प मेळाव्यात ठाकरे बंधूंवर थेट निशाणा साधला. मुंबईच्या विकास आणि 2019 च्या निवडणुकांच्या पार्श्वभूमीवर त्यांनी उद्धव ठाकरे यांच्यासाठी प्रसिद्ध गाणे “अच्छा सिला दिया तूने मेरे प्यार का, यार ने ही लूट लिया घर यार का” गायले. या आक्रमक भाषणाने सभागृहात टाळ्यांचा कडकडाट झाला, तर राजकीय वर्तुळात चर्चांना उधाण आले.
ठाकरे बंधूंवर खडेबोल
मुख्यमंत्री देवेंद्र फडणवीस यांनी मेळाव्यात मुंबई महानगरपालिका (BMC) निवडणुकांच्या पार्श्वभूमीवर ठाकरे बंधूंवर हल्लाबोल केला. ते म्हणाले की, बाळासाहेब ठाकरे हे एक ब्रँड होते, पण फक्त नाव जोडल्याने कोणी ब्रँड बनत नाही. ठाकरे बंधू (उद्धव आणि राज ठाकरे) यांच्यावर निशाना साधत त्यांनी मुंबईच्या विकासावरून टीका केली.
फडणवीस म्हणाले, “भाजप पायाभूत सुविधांच्या विकासाद्वारे मुंबईची पुनर्कल्पना करत असताना, काही लोक फक्त खुर्चीसाठी पुनर्कल्पना करत आहेत. मात्र त्यांना ती खुर्ची मिळणार नाही. महायुती मुंबईवर भगवा झेंडा फडकवेल आणि BMC मध्ये महायुतीचा महापौर असेल.”
फडणवीस यांनी 2019 च्या विधानसभा निवडणुकांची आठवण करून दिली. ते म्हणाले, “गेल्या वेळी उद्धव ठाकरेंना महापौर आपला हवा होता. आम्ही थोडाही विलंब केला नाही. सर्वांना बोलावले आणि सांगितले की तुम्ही महापौर, उपमहापौर आणि स्थायी समिती अध्यक्ष घेऊ शकता. आम्ही विरोधकांचे काम करणार नाही, पण जर तुम्ही चूक केली तर आम्ही त्यावर लक्ष ठेवू.”
मात्र, निवडणुकीनंतर उद्धव ठाकरे यांनी शिवसेना-काँग्रेस-राष्ट्रवादीच्या महाविकास आघाडीचा भाग घेतला, ज्यामुळे फडणवीस सरकार पडले आणि उद्धव मुख्यमंत्री झाले. या पार्श्वभूमीवर फडणवीस यांनी गाणे गात उपकारांची कदर नसल्याचा आरोप केला: “अच्छा सिला दिया तूने मेरे प्यार का, यार ने ही लूट लिया घर यार का.” हे गाणे गाताना सभागृहात हास्य आणि टाळ्यांचा कडकडाट झाला.
