PMPML Bus Accidents: पुण्यातील सार्वजनिक वाहतूक व्यवस्थेची सुरक्षितता पुन्हा एकदा चर्चेत आली आहे. पीएमपीएमएल बस अपघातांची संख्या गेल्या वर्ष-दीड वर्षात लक्षणीयरीत्या वाढली असून, आकडेवारी पाहता परिस्थिती किती धोकादायक बनली आहे हे स्पष्ट होते. मागील १९ महिन्यांत तब्बल ४४ जणांनी जीव गमावला आहे तर ५५ पेक्षा जास्त प्रवासी जखमी झाले आहेत. यामुळे बस चालकांचे प्रशिक्षण, देखरेख आणि प्रशासनाच्या सुरक्षाविषयक पद्धतींवर अनेक प्रश्न उपस्थित होत आहेत.
एप्रिल ते ऑक्टोबर २०२५ या कालावधीत पीएमपीएमएलच्या बसेस २२ गंभीर अपघातांत सामील झाल्या. यात १५ जणांचा मृत्यू झाला तर ११ जण गंभीर जखमी झाले. या दुर्घटना मागील वर्षांच्या तुलनेत अधिक आहेत. २०२४ मध्ये एकूण ५३ अपघातांची नोंद झाली होती. त्यातील १२ अपघात चालकांच्या चुकीमुळे झाल्याचे स्पष्ट झाले होते. मात्र चालू आर्थिक वर्षात ही संख्या दुप्पट झाली असून २८ दुर्घटनांना थेट चालकांची चूक कारणीभूत ठरली आहे.
हेही वाचा – Pune: पुणेकरांनो लक्ष द्या! उघड्यावर शेकोटी पेटवल्यास बसणार दंड, थंडीच्या दिवसात महापालिकेचा अजब निर्णय
अनेक प्रवाशांनी चालकांच्या बेफिकीर वागणुकीबाबत गंभीर तक्रारी केल्या आहेत. कात्रज येथील महिला प्रवासी म्हणाल्या, चालकांनी रस्त्यावर अचानक वेग वाढवणे किंवा झटका देऊन ब्रेक लावणे हे जणू नेहमीचे झाले आहे. कितीदा सांगितलं, तक्रारी केल्या… पण काहीच बदल होत नाही. तथापी, आणखी एका प्रवाशाने सांगितले की, या महिन्यात दोनदा आमची बस एका दुचाकीला धडकणारच होती. चालकांना वेगाची अजिबात पर्वा नसल्याचे दिसते. ही परिस्थिती अत्यंत धोकादायक आहे.
