अहमदाबाद: विजय हजारे करंडक २०२४-२५ स्पर्धेच्या क गटातील सामन्यात शनिवारी ‘प्लेयर ऑफ द मॅच’ झालेला पंजाबचा फलंदाज अनमोलप्रीत सिंगने अरुणाचल प्रदेशविरुद्ध अवघ्या ३५ चेंडूंत शतक झळकावले. लिस्ट-ए क्रिकेटमध्ये सर्वांत जलद शतक झळकावणारा अनमोलप्रीत हा पहिला भारतीय फलंदाज ठरला आहे. त्याने ४५ चेंडूंत नाबाद ११५ धावा करताना तब्बल ९ षटकार आणि १२ चौकार लगावले.
त्याच्या बहारदार फलंदाजीच्या जोरावर पंजाबने अरुणाचल प्रदेशवर खून ९ गडी राखून विजय मिळवला. पंजाबने स्पर्धेतील पहिल्या सामन्यात १६५ धावांचे लक्ष्य अवघ्या १२.५ षटकांत पूर्ण केले. पंजाबने नाणेफेक जिंकून अरुणाचलविरुद्ध प्रथम गोलंदाजी करण्याचा निर्णय घेतला. अरुणाचलने ४८.४ षटकांत सर्वबाद १६४ धावा केल्या. १६५ धावांचे लक्ष्य पंजाबने अवघे एक विकेट गमावून साकार केले. कर्णधार अभिषेक शर्मा १० धावांवर बाद झाल्यानंतर प्रभसिमरन सिंगने २५ चेंडूंत नाबाद ३५ धावा करत अनमोलप्रीतला मोलाची साथ दिली.
अनमोलप्रीतचे शतक हे लिस्ट ए इतिहासातील तिसरे वेगवान शतक ठरले. ऑस्ट्रेलियाचा जॅक फ्रे झर मॅकगर्क (२९ चेंडू) आणि दक्षिण आफ्रिकेचा दिग्गज एबी डिव्हिलियर्स (३१ चेंडू) यांच्या नावावर सर्वाधिक वेगवान शतक आहेत. अनमोलप्रीतने भारताचा माजी फलंदाज युसूफ पठाणचा विक्रम मोडला. युसूफने २०१० मध्ये महाराष्ट्राविरुद्ध बडोद्याकडून खेळताना ४० चेंडूत शतक झळकावले होते. अनमोलप्रीतने केवळ ३५ चेंडूंत शतक झळकाविले. ४५ चेंडूंत १२ चौकार आणि ९ षटकारांच्या मदतीने ११५ धावांची जलद खेळी केली.
