जळगाव: ज्येष्ठ नेते आणि माजी मंत्री एकनाथ खडसे यांच्या मुक्ताईनगर येथील निवासस्थानी झालेल्या चोरीच्या घटनेने नवे वळण घेतले आहे. सुरुवातीला या चोरटी प्रकरणात सोने, चांदी आणि रोकड चोरीला गेल्याचं समोर आलं होतं. मात्र आता खडसे यांनी स्वतःच एक खळबळजनक उघड केला आहे. चोरट्यांनी त्यांच्या घरातून काही अत्यंत संवेदनशील कागदपत्रं, सीडी आणि पेनड्राइव्ह देखील उचलून नेली आहेत, असा दावा एकनाथ खडसे यांनी केला आहे.
सोनेच नव्हे, तर ‘माहिती’चाही खजिना लंपास
27 ऑक्टोबरच्या रात्री खडसेंच्या मुक्ताईनगरमधील बंगल्यात चोरी झाली. घराचे कुलूप फोडून चोरट्यांनी सुमारे सहा ते सात तोळे सोने आणि ३५ हजारांची रोकड चोरून नेली. पण नंतर बारकाईने पाहणी केल्यावर खडसे यांना लक्षात आलं की, घरातून महत्त्वाच्या फाईल्स, सीडी आणि पेनड्राइव्ह देखील गायब आहेत. या वस्तूंमध्ये नेमकं काय होतं, यावरून आता राजकीय वर्तुळात मोठी चर्चा रंगली आहे.
पत्रकारांशी बोलताना एकनाथ खडसे म्हणाले, या चोरीमागचं उद्दिष्ट केवळ आर्थिक नसून काही गुप्त माहिती मिळवण्याचं असावं. माझ्या घरातून घेतलेल्या कागदपत्रांमध्ये काही भ्रष्टाचारसंबंधी माहिती होती, जी मी माहिती अधिकारातून मिळवली होती. त्यांनी पुढे सांगितलं की, या सीडी आणि पेनड्राइव्हमध्येही काही संवेदनशील माहिती होती. सीडी आणि पेनड्राइव्ह नक्की कोणत्या कारणाने चोरीस गेल्या, याचा तपास होणं गरजेचं आहे.
हेही वाचा – मोठी बातमी..! एकनाथ खडसे यांच्या निवासस्थानी जबरी चोरी; कपाटं फोडून लाखोंचा मुद्देमाल लंपास
खडसे यांनी संशय व्यक्त केला की, या चोरट्यांना घरातील वस्तूंचं अचूक ठिकाण माहित होतं. त्यामुळे ही साधी चोरी नसून, पूर्वनियोजित कारवाई असू शकते. त्यांनी हेही सांगितलं की, चोरी होण्यापूर्वी त्यांच्या घराच्या परिसरातील लाईट अचानक बंद झाली होती, आणि काही मिनिटांतच चोरट्यांनी डाव साधला. त्यामुळे पोलिसांनी या तांत्रिक बाबींचाही तपास करावा, अशी मागणी त्यांनी केली आहे.
पोलिस तपासावर खडसेंचा विश्वास
खडसे म्हणाले, राजकीय नेत्याच्या घरात चोरी होणं हे पोलिसांसाठीही प्रतिष्ठेचं प्रकरण आहे. मला खात्री आहे, पोलीस या घटनेचा छडा लावतील आणि या चोरीमागचा खरा हेतू उघड करतील.
