मुंबई : मुख्यमंत्री माझी लाडकी बहिण योजनेच्या लाभार्थी महिलांसाठी एक महत्त्वाची आणि शेवटची संधी आहे. दरमहा १,५०० रुपयांचा आर्थिक सहाय्य मिळवण्यासाठी E-KYC प्रक्रिया अनिवार्य करण्यात आली असून, तिची मुदत आता फक्त काही दिवसांत संपणार आहे. आज (२९ ऑक्टोबर) पासून १८ नोव्हेंबर २०२५ पर्यंत फक्त २० दिवस उरले आहेत. ही प्रक्रिया पूर्ण न केल्यास योजनेचा लाभ थांबण्याची शक्यता आहे. महिला व बालविकास विभागाने यासंदर्भात सतर्क केले असून, लाखो पात्र महिलांना या चूकीमुळे आर्थिक नुकसान होऊ नये म्हणून तात्काळ कारवाई करण्याचे आवाहन केले आहे.
महायुती सरकारने जुलै २०२४ मध्ये सुरू केलेल्या या योजनेचा उद्देश २१ ते ६५ वर्षे वयोगटातील महिलांना आर्थिकदृष्ट्या सक्षम करणे आहे. वार्षिक कौटुंबिक उत्पन्न २.५ लाख रुपयांपेक्षा कमी असलेल्या महिलांना दरमहा १,५०० रुपये थेट बँक खात्यात जमा होतात. आतापर्यंत लाखो महिलांनी अर्ज केले असून, पहिल्या टप्प्यातील अर्ज प्रक्रिया ऑक्टोबर २०२४ मध्ये बंद झाली. मात्र, फसवणूक टाळण्यासाठी आणि पारदर्शकता सुनिश्चित करण्यासाठी E-KYC अनिवार्य करण्यात आली. ही प्रक्रिया आधार-आधारित असून, पात्रतेची पडताळणी करण्यासाठी पती किंवा वडिलांचीही E-KYC आवश्यक आहे.
E-KYC दरम्यान OTP मिळण्यात आणि सर्व्हरमध्ये अडचणी येत असल्याचे तक्रारी मिळाल्या होत्या. तटकरे यांनी या समस्या निदर्शनास घेतल्या असून, मंत्रालयात बैठक घेऊन सुधारणा सुरू केल्या आहेत. विशेषतः, अलीकडील पूरग्रस्त भागातील महिलांसाठी मुदत १५ दिवसांनी वाढवण्यात आली आहे, ज्यामुळे त्या ३ डिसेंबर २०२५ पर्यंत प्रक्रिया पूर्ण करू शकतील. मात्र, इतर भागांसाठी १८ नोव्हेंबर ही अंतिम मुदत आहे. जर E-KYC पूर्ण झाली नाही, तर आधार प्रमाणीकरण न झाल्याने लाभ बंद होईल आणि तो पुन्हा सुरू करण्यासाठी अतिरिक्त प्रक्रिया करावी लागेल. ही E-KYC प्रक्रिया दरवर्षी अनिवार्य राहील.
E-KYC कसे करावे?
1. पोर्टलवर जा : https://ladakibahin.maharashtra.gov.in वर भेट द्या आणि ‘E-KYC’ बॅनरवर क्लिक करा.
2. नोंदणी क्रमांक किंवा आधार एंटर करा : तुमचा अर्ज नोंदणी क्रमांक किंवा आधार नंबर टाका.
3. OTP वेरीफाय : नोंदवलेल्या मोबाइलवर येणाऱ्या OTP ने पडताळणी करा. (तांत्रिक समस्या असल्यास हेल्पलाइन १८००-२०२-०४०४ वर संपर्क साधा.)
4. कागदपत्रे अपलोड : फोटो, आधार आणि इतर आवश्यक दस्तऐवज स्कॅन करून अपलोड करा. पती किंवा वडिलांचीही माहिती भरा.
5. सबमिट आणि स्टेटस चेक : प्रक्रिया पूर्ण झाल्यावर स्टेटस तपासा. ‘नारी शक्ती दूत’ अॅपद्वारेही हे करता येते.
मुख्यमंत्री माझी लाडकी बहीण योजनेमध्ये पारदर्शकता येण्यासाठी व लाभार्थ्यांना नियमितपणे आर्थिक लाभ मिळण्यासाठी e-KYC सुविधा उपलब्ध करून देण्यात आली आहे. या प्रक्रियेत अधिक सुसूत्रता आणण्याबाबत आज मंत्रालयात बैठक घेतली.
दिनांक १८ सप्टेंबर २०२५ पासून https://t.co/gBViSYZxcm या…
— Aditi S Tatkare (@iAditiTatkare) October 28, 2025
